أسامة منير .... ياريت تسيب الشباب في حالهم وتحل عن سماهم

منقوووووووووووول.....في الحقيقة انا كنت ناوية البوست ده أنزل فيه اخر يوم في المؤتمر بتاع القاهرة مع الصور زي ما كتبت قبل كده

بس لقيتني مش قادرة ماكتبش عن الاخ اسامة منير بتاع اذاعة الاف ام في البرنامج بتاع نص الليل بتاعه اللى بيناقش فيه مشاكل الشباب المفروض يعني على حسب ما فهمت من المرتين اللى سمعت فيهم البرنامج



انا شخصيا مش من هواة الاستماع للراديو عامة ولا اى اذاعة عليه الا القرآن الكريم وأحيانا كنت اسمع لندن ... بس من فترة سمعت من واحدة قريبتي عن برنامج اسامة منير ... وطبعا هو شخص في وسط الشباب غني عن التعريف ... فقلت مايضرش افتح الاف ام واسمع برنامج الاخ منير خاصة انى بحب جدا اسمع المشاكل الشبابية لرصد طريقة تفكير شريحة الشباب وصل لاى مدى



بالامس كانت تجربتي الثانية مع البرنامج لأن المرة الاولى لحقته وهو بيخلص ... فتحت الراديو على الاذاعة فكان آلو نستقبل أول اتصال معانا



كانت بنوتة عندها 23 سنة .. طيب انتي مرتبطة ... أيوة مرتبطة بشاب وبنحب بعض من سبع شهور وقابلته مرة واحدة بس شهر اتنين اللى فات ..

واتكلموا على موضوع الحلقة اللى كان عن الفضفضة ..بتفضفضي لمين أسراراك وبتحكي لمين



المهم في اخر المكالمة انا عندي مشكلة ياأسامة .. اتفضلي انا سامعك ... المشكلة دلوقتي انه صاحبي (فيما يعني الشخص اللى انا مرتبطة بيه) عايزني اخرج معاه ..وانا بصراحة مش بحب حكاية الخروج دي ورافضة خالص اني اخرج معاه علشان تربيتي ماتسمحش بكده وانا مش عايزة

ايوة بس لازم تخرجي معاه علشان تعرفيه اكتر وتشوفيه وهو بيتعامل مع الناس افرضي عينه طلعت زايغة او طلع بخيل او طلع فيه عيب ما مش لازم تعرفيه كويس علشان لما يجي يتقدم تكوني خلاص عرفتيه كويس !! لانه معرفة النت او التليفون مش كفاية علشان تحكمي على الشخص

وبعدين طالما ماما عارفة انك مرتبطة فممكن تستأذنيها وتقوليلها هانقعد سوا في كافي شوب نشرب قهوة ولا عصير علشان تقربوا من بعض وكده وربنا يوفقك ويكتب لك الخير

مع السلامة

--

كده انتهت المكالمة الاولى ..وانا مش مصدقة اللى سمعته بصراحة

ومش مشكلة البنت اللى خلتني مذهولة لكن رد هذا الاسامة عليها صدقا

يعني انا اتعرف على شاب عن طريق التليفون او الانترنت ونتقابل على اساس انا قايلة لماما ونقعد سوا علشان نتعرف ونقرب من بعض سنة بقى سنتين زي ما تيجي تيجي وبعدين يجي يتقدم لي في البيت !!



اى منطق ده ... طيب افرض ياأستاذ اسامة ماحصلش نصيب واتخانقوا في النص سمعة البنت اللى نصيحتك الغالية ليها بالخروج مع شاب غريب عنها هاتبقى ايه دلوقتي



المجتمع اللى مش بيرحم البنت لو غلطت او صاحبت هايعمل فيها ايه



هاتتجو ازاى البنت اللى انت نصحتها انها تخرج معاه وتعرفه لما جوزها يكون فاقد الثقة فيها اصلا لأنها خرجت مع صاحبها من دون ارتباط رسمي



(كلامي ده على اساس انه موجه لناس غير ملتزمة ياجماعة )



نيجي بقى للشرع والدين اللى واضح أوي انه كل علاقتنا بيهم بقوا ماتخافيش ربنا هايوفقك علشان انتي نيتك كويسة

!!!!!!

----

امال فترة الخطوبة اتعملت ليه ياجماعة ... واتشرعت في الاسلام ليه .. مش علشان اللى عايز يرتبط بواحدة يدخل بيتها من الباب مش من الشباك ويكون ادام اهلها ومجتمعها خاطب ليها ..ماهو لو عايز بجد ما يدخل البيت من بابه ويقعد معاها براحته ويتعرفوا على بعض ولا لازم برة خنقة البيت وماما وبابا واخواتي وكده يعني .



لما ربنا يشرعلنا فترة خطبة تطول وتقصر للتعرف على شريك الحياة بصورة شرعية وتحت نظر الاهل وفي الحدود اللى ربنا شرعها في التواصل بين الخطيبين يبقى ليه بنلف وندور على شرع ربنا

ده حتى مصطلح (الارتباط) بقى معناه صاحبي او صاحبتي



يبدأ سؤاله ليها مرتبطة تقوله اه .. طيب مخطوبة او متجوزة تقوله لأ

يعني حتى كلمة الارتباط شوهوا معناها

بجد بجد الواحد بيحمد ربنا على نعمة الالتزام

وقبل نعمة الالتزام نعمة العقل اللى ربنا اداه للواحد يفكر بيه ده صح ولا غلط



بجد وانا بسمع البرنامج والردود السخيفة بتاعت اسامة ده على الاتصالات اللى كلها من بنات في سن العشرين والتلاتة وعشرين وتحليله الغريب للموضوعات واجاباته وحلوله لمشكلات زي دي مع متابعة العدد ده من الشباب ليه حسيت اني مخنوقة بجد

بيحللوا الحرام ويزوقوه في عيون الشباب ويشوهوا الحلال ويزيفوه ويبعدوهم عنه



حسبنا الله ونعم الوكيل [/color]

للأسف.. هي دي الحقيقة المرّة..

وهو دة الهدف..

لكل البرامج الموجهة للشباب.. اللي ما بيصدق.. بحاجة تحلل له الغلط اللي هو بيعمله..

وتسهل عليه تأنيب الضمير... اللي ممكن كان يردعه.. عن أي حاجة وحشة.. بتخطر على باله من وقت للتاني..

زي أي بني آدم طبيعي...

وبدل ما يعدلوهم... بيزقوهم لغلط أفدح.. وأفظع..

كفانا الله وإياكم كل سوء..

انا مبسوطة جدا ان موضوع اسامة منير ده اتطرح انا شخصيا باحب الاذاعة عموما بس الاذاعة مش ف م بس فيه اذاعات مفيده جداا جداا تانية ماعلينا منها دلوقتي انا لما باسمع اسامة منير باحس بالظلام ايلي في الدنيا واقعد اسال نفسي ميت سؤال وسؤال هو ايه ده وليه ؟ وباحس ان عدد من الشباب لا يستهان بيه في غفلة جامدة جدا وعلي قد ما باستاء علي قد ما الحقيقة بتفرض نفسها ويمكن نصحي ونفوق. الحياة مش بالتفاهة دي ولا الحب والزواج تجربة . عندنا منهج يارب ندور عليه ونلاقيه

استاذنا معلش المرادي هيا ماتقصدش هيا بتقول مبسوطة اني ناقشت الموضوع ده هيا رايها من راينا